ປະຫວັດຄວາມເປັນມາຂອງ ຫສກ
ຫໍສະໝຸດກາງ ມະຫາວິທະຍາໄລແຫ່ງຊາດ ສ້າງຕັ້ງຂຶ້ນໃນປີ 1996 ໂດຍສືບທອດເອົາຊັບພະຍາກອນຫ້ອງສະໝຸດທີ່ສ້າງຂຶ້ນໃນປີ 1960, ແຕ່ກ່ອນເອີ້ນວ່າ “ຫ້ອງສະໝຸດສະຖາບັນສ້າງຄູດົງສະພັງເມິກ (ກາຍມາເປັນ ມະຫາວິທະຍາໄລສ້າງຄູວຽງຈັນ ຫລັງຈາກ ປີ 1976) ເຊິ່ງກວມເອົາເຄິ່ງໜຶ່ງຂອງຊັ້ນທີ່ 1 ເບື້ອງຕາເວັນອອກຂອງຕຶກອະທິການບໍດີຫລັງເກົ່າ ຫລື ເອີ້ນກັນວ່າ: “ຕຶກແດງ” (ເພາະວ່າຫລັງຄາຂອງຕຶກມຸງດ້ວຍດິນຂໍສີແດງ) ເປັນຈຸເລີ່ມຕົ້ນວຽກງານຫ້ອງສະໝຸດຫລັງທຳອິດ.
ໃນເວລານັ້ນ ຫ້ອງສະໝຸດໄດ້ແບ່ງອອກເປັນ 2 ພາກສ່ວນໃຫຍ່ ຄື: ຫ້ອງສະໝຸດພະແນກພາສາອັງກິດ ແລະ ຫ້ອງສະໝຸດວິທະຍາໄລຄູ ເຊີ່ງໄດ້ໃຫ້ບໍລິການປຶ້ມ, ວາລະສານ, ໜັງສືພິມ ແລະ ຂໍ້ມູນຕ່າງໆ ທີ່ຕອບສະໜອງໃຫ້ວຽກງານ ການຮຽນ-ການສອນ. ການບໍລິການສ່ວນໜຶ່ງອານຸຍາດໃຫ້ນັກສຶກສາສາມາດຢືມປຶ້ມໄປໃຊ້ຕະຫລອດສົກຮຽນໄດ້ ທ້າຍປີຮຽນຈິ່ງນຳເອົາປຶ້ມມາສົ່ງ.
ໃນປີ 1984 ຫໍສະໝຸດໄດ້ຍ້າຍຈາກຕຶກຫລັງຄາແດງມາຕັ້ງຢູ່ບໍລິເວນເຄີ່ງໜຶ່ງຂອງຊັ້ນທີ 2 ເບື້ອງຕາເວັນຕົກຂອງອາຄານ ຄະນະອັກສອນສາດ ຫລັງທີໜຶ່ງພາກວິຊາພາສາອັງກິດໃນປະຈຸບັນ. ໃນການພັດທະນາວຽກງານ ແລະ ວິຊາການຫ້ອງສະໝຸດ ພວກເຮົາກໍໄດ້ຮັບ ການຊ່ວຍເຫຼືອຈາກພາຍໃນ ແລະ ສາກົນ ເຊັ່ນ ປີ 1988-90 ມີ ຊ່ຽວຊານອາສາສະໝັກຈາກ ປະເທດອົດສະຕາລີ 1 ທ່ານ ຊື່ Cathy Robertson ມາເຮັດວຽກກ່ຽວກັບວຽກງານຫ້ອງສະໝຸດໂດຍສະເພາະ ເປັນເວລາ 2 ປີ.
ແຕ່ປີ 1992-93 ທາງມະຫາວິທະຍາໄລສ້າງຄູວຽງຈັນ ກໍຄືກະຊວງສຶກສາທິການ ແລະ ກິລາໄດ້ຮັບທຶນຊ່ວຍເຫລືອກໍ່ສ້າງອາຄານຫໍສະໝຸດຫລັງໃໝ່ຈາກສາກົນ ໂດຍແມ່ນທຶນຊ່ວຍເຫລືອປຸກສ້າງຂອງໂຄງການ UNESCO-AGFUND ອາຄານດັ່ງກ່າວໄດ້ສ້າງສຳເລັດທ້າຍປີ 1993 ແລະ ໄດ້ເປີດໃຫ້ບໍລິການໃນ ວັນທີ 01.01.1994 ຢ່າງເປັນທາງການ.
ປີ 1995 ຄຽງຄູ່ກັບການສ້າງຕັ້ງມະຫາວິທະຍາໄລແຫ່ງຊາດ ເຊິ່ງໄດ້ຮວບຮວມເອົາ ບັນດາວິທະຍາໄລ ແລະ ສະຖາບັນຊັ້ນສູງອື່ນໆພາຍໃນເທດສະບານເຂົ້າກັນ. ສ່ວນຫ້ອງສະໝຸດຂອງມະຫາວິທະຍາໄລສ້າງຄູວຽງຈັນ ໃນເມື່ອກ່ອນ ກໍໄດ້ຖືກຮັບຮອງຈາກ ກະຊວງສຶກສາທິການ ແລະ ກິລາ ໃຫ້ເປັນຫໍສະໝຸດກາງ ຂອງມະຫາວິທະຍາໄລແຫ່ງຊາດຢ່າງເປັນທາງການຈົນເຖີງປະຈຸບັນ.